ХЗХ-оос хураасан хөрөнгийг ШШГЕГ-ын ажилтнууд шамшигдуулжээ
Хадгаламж зээлийн хоршоодоос болж хохирсон иргэд эдгээр хоршоог төрийн зохион байгуулалттайгаар дампууруулсан гэж үзэн, энэ талаараа гомдоллосоор хэдэн жилийн нүүр үзлээ.Тухайн үед "Тус хоршоодыг эздийг олон жилээр яллаж, хохирогчдын хөрөнгийг хураан авлаа. Тиймээс хүмүүсийн хохирлыг удахгүй барагдуулах болно" гэсэн сүржин мессежийг олон нийтэд тарааж байсан.
Гэтэл олон нийт 2006 онд Хадгаламж зээлийн 26 хоршоог МАН, тухайн үеийн МАХН-ын хэсэг бүлэг хүмүүс үгсэн хуйвалдаж, хүчээр дампууруулан 100 орчим тэрбум төгрөгийн эд хөрөнгийг нь хураасан гэж үзжээ. Зөвхөн автомашин л гэхэд 150 гаруй ширхгийг хураасан, үүний 48 нь замаасаа алга болж, улсын өмч болсон гэсэн нэрээр бүртгэгдэн үлдсэн. Цаана нь үлдсэн 100 орчим автомашины эд анги, мотор, тэр ч бүү хэл өнгө нь хүртэл солигдож, хэнд ч хэрэггүй төмрийн сэг болон Амгалан дахь нэгэн хашаанд долоон жил болжээ. Манай сонин өмнө нь ХЗХ-ны хохирогчдын хөрөнгийг ШШГЕГ-ын ажилтнууд дур мэдэн хувьдаа завшиж, танил тал болон ах дүү, амраг садандаа хямд үнээр өгч байсан тухай мэдээлж байсан. Хохирогчдын хөрөнгийг нуун дарагдуулж шамшигдуулсан албан тушаалтнуудын хэрэг цагаан захтануудын араас хөврөх бололтой. Хэрэгт ШШГЕГ-ын нэр бүхий албан тушаалтуудад холбогдож, эрүүгийн хэрэг үүсгэж шалгаж эхэлсэн байна. Түүнчлэн ашигт малтмалын хайгуулын болон ашиглалтын дөрвөн лицензийн эзэмших эрхийг сэргээж, ШШГЕГ-ын мэдэлд шилжүүлжээ.
Дампуурсан гэх ХЗХ-ны өмчлөл, эзэмшилд байсан ч хохирогчдын хохирол барагдуулах жагсаалтад бүртгэгдээгүй "Глоб кредит" хоршооны 68 айлын орон сууц, 24 машины гарааш зэрэг нуугдмал хөрөнгийг илрүүлснээ хохирогчдын төлөөлөл ярив. Тухайлбал, өнгөрсөн оны аравдугаар сард ХЗХ-ны хохирогчид Ерөнхий сайд Н.Алтанхуягт өргөх бичиг барьсан. Өргөх бичиг ШШГЕГ-ын нэр бүхий албан тушаалтнууд ХЗХ-дын эздийн хөрөнгийг үнэгүйдүүлж, далд хэлбэрээр завшиж байна гэсэн утгатай бөгөөд эл хэргийг шалгуулах ажлын алба гаргасан юм. Харин Улсын мөрдөн байцаах газраас энэ хэрэгт холбоотой албан тушаалтнуудыг мөрдөн байцааж, хохирогчдын хөрөнгийг хэрхэн яаж шамшигдуулж байсныг илрүүлсэн байна. Хамгийн сонирхолтой нь, хөдлөх болон үл хөдлөх хөрөнгийг шамшигдуулсан хэрэгт Шүүхийн шийдвэр гүйцэтгэх албаны долоон ажилтан холбоотой аж. Тодруулбал, ШШГЕГ-ын Дотоод хяналтын албаны мэргэжилтэн Р.Энхтайван, hхлах шийдвэр гүйцэтгэгч Н.Батсүх, iийдвэр гүйцэтгэгч Б.Мөнхбат, Д.Оюунсүрэн, Р.Энхтуяа, Г.Батмөнх нар холбоотой юм байна. Дээрх албан тушаалтнууд үгсэн хуйвалдаж Баянзүрх дүүргийн XV хорооны нутагт байрлах 24 автомашины гараж, 68 айлын орон сууцны дөрвөн давхар барилгынметр квадратын үнийг гурав дахин бууруулж, өөрсдийн ах, дүү, хамаатан садандаа худалдсан байх юм.
Мөн ШШГЕГ-ын албан тушаалтнууд хохирогчдын хөрөнгийг шүүхийн шатанд үнэгүйдүүлэн алга болгосон эд хөрөнгийн жагсаалт тун удахгүй олон нийтэд ил болох бололтой. Түүнчлэн тус газрынхны зохиомол дуудлага худалдаагаар үнэгүйдүүлэн, зах зээлийн ханшаас хэт доогуур зарж борлуулсан хөрөнгийг ч илрүүлсэн байна. Үүнд: "Гэр хорооллын барилгажилт" ХЗХ-ноос хураагдсан, П.Н.Шастины нэрэмжит нэгдсэн III эмнэлгийн замын урд байрлах, 15х18 метрийн хэмжээтэй дутуу баригдсан барилгыг газрын хамт 87 сая төгрөг буюу одоогийн хоёр өрөө байрны үнээр зарсан. "Гэр хорооллын барилгажилт" ХЗХ-ны нэр дээрх, Сүхбаатар дүүргийн IX хороонд байрлах, 831 метр квадрат газрыг 85 сая төгрөгөөр худалджээ. Энэ газар нь 2008 онд үнэлгээний комиссоор 150-200 сая төгрөгийн үнэтэй гэж гарсан ч Шүүхийн шийдвэрийнхэн 12 удаагийн хуурамч дуудлага худалдааг зохион байгуулж, үнэгүйдүүлэн ийм бага үнээр худалдсан. Дээрх долоон албан тушаалтан энэ хэрэгт хамаатай гэдэг нь баримтаар нотлогдож эхлээд байгаа аж.
Энэ мэтчилэнгээр шүүхийн шийдвэр гүйцэтгэх шатанд хураагдсан эд хөрөнгүүдээс үнэ бүхий зарим эд хөрөнгийг нуун дарагдуулж, хувьдаа болон ах, дүү, хамаатан садан, найз нөхдөөрөө завшсан хэргүүд ар араасаа гарч, шинэ хэрэг үүсээд байна. Хохирогчдын хэлж буйгаар, ШШГЕГ-т асуудал их байдаг гэнэ. Тухайлбал, хэргийн материалыг өөрсдөө устгасан тохиолдол ч бий бөгөөд хохирогчид дахин хөөцөлдөөд олоод өгөхөөр "Шийдвэр гүйцэтгэгч чинь ажлаасаа халагдсан" гэж хэлсэн гэнэ. Таван сая төгрөг авах гэж арван жил хөөцөлдөөд таван сая төгрөгийн зарлага гаргадаг гэж байсан юм. Эх сурвалжийн мэдээлж буйгаар, дээрх долоон хүнтэй холбоотой хэд хэдэн хүн шалгагдах магадалтай гэнэ. Ямартай ч дээрх ажлын хэсгийг Хууль зүйн сайд Х.Тэмүүжин ахлан ажиллаж, энэ талаарх мэдээллийг иргэдэд болон хохирогчдод нээлттэй мэдээлэх аж. ХЗХ-нд байдгаа тавиад туусан нэг хохирогч "Төр бидний хохирлыг одоо л барагдуулж өгөх байх. Хохирлоо барагдуулах гэж хохирсноосоо их зарлага гаргалаа" гэсэн юм.
Хэргийн үйл явцын талаар дахин мэдээлэх болно.
Р.САРУУЛ
0 comments:
Post a Comment