"Нарантуул" худалдааны төвийн зүүн талд байрлах "Эрэл" компанийн "Шинэ үе" хотхоны оршин суугчид өчигдөр өглөө бужигнав. Учир нь нэг шөнийн дотор оршин суугчдын таван машиныг тоносон хэрэг гарчээ. Шөнийн 23:00 цагт машинаа орцныхоо үүдэнд тавиад өглөө 07:00 цагт гараад ирэхэд машиных нь хаалга, хамар нь нээлттэй. Аккумлятор, хөгжмийг нь тоночихсон, цонх нь хагархай, багаж хэрэгслийг нь хулгайлчихсан, бүр дугуйг нь тайлаад авчихсан байжээ. "Шинэ үе" хотхоны оршин суугчдын машиныг өнгөрсөн арваннэгдүгээр сараас иймэрхүү янзтайгаар тонуулчид ээрэх болж. Уг хотхон ашиглалтад ороод жил гаруйхан хугацаа өнгөрч буй. Захаас зүүн тийш нэг километр хүрэхгүй зайд байрлах хотхонд иргэд анх байр худалдан авахад нь "Эрэл"-ийнхэн "Нарантуул" худалдааны төв хотын зах руу нүүнэ, тэгэхээр цэвэр агаартай саруул сайхан талбай гарна" хэмээн сурталчилж байжээ. Гэвч одоо "Нарантуул"-ынхан ойрын хэдэн жилдээ буурь сэлгэхгүйг албаныхан мэдэгдчихсэн. Ингээд автомашины тонуулчид оршин суугчдын дайсан хэвээр үлдэхээр боллоо. Биднийг өчигдөр 09:00 цагт тус газарт очиход "Шинэ үе" хотхоны 105 дугаар байрны үүдэнд байсан хоёр автомашиныг тоносон байлаа. "Sizuki" загварын дунд оврын жийп машины цонхны гурвалжин шилийг хагалж, хаалгыг нь онгойлгон ком багажийг нь хулгайлжээ. Зэргэлдээ байсан "Delica" загварын машиныг мөн л адил нээж, доторх эд зүйлийг нь тоносон байв. Машин тоносон хулгайн талаар оршин суугчид ингэж ярьсан юм.
С.Мөнх-Эрдэнэ: 
ХУЛГАЙЧИД БҮР МЭРГЭШЧИХЭЖ
- Энэ байранд ороод хоёр сар орчим болж байна. Өчигдөр орой 23:00 цагийн үед машинаа тавиад өглөө гараад иртэл хамар нь онгорхой, аккумлятор байхгүй, машины хаалга ч нээлттэй хөгжмийг нь аваад явчихсан байсан. Яаж онгойлголгосныг бүү мэд. Мэргэжлийн хүмүүс юм шиг байна.
Д.Найгалмаа:
КОМ БАГАЖАА ТОНУУЛЧИХЛАА
- Өчигдөр миний машины дугаарын хязгаарлалттай өдөр байсан болохоор байрны үүдэнд өнжсөн. Тийм болохоор орой 21:00 цагийн үед ажлаасаа ирэхдээ машинаа эргэж тойрч харчихаад гэртээ орсон. Гэтэл өглөө хүмүүс бужигналдах чимээнээр гарч иртэл машиныг маань ийм болгочихож. Хойд цонхыг нь хагалаад ком багажийг тоночихсон байна.
О.Буянжаргал:
НЭГ САЯ ГАРУЙ ТӨГРӨГИЙН ЭД ЗҮЙЛЭЭ АЛДЛАА
-Өглөө ажилдаа явахаар гараад иртэл Delica загварын машины маань лед дэлгэцтэй хөгжим, машин дээр байсан дөрвөн гэрлийг хулгайлчихсан байна. Ойролцоогоор нэг сая гаруй төгрөгийн хохирол амслаа. Хулгайчид бүлэг хүмүүс байгаа юм шиг. Энэ хавийн таван машиныг нэг оройн дотор тоночихсон байна шүү дээ. Өвлийн турш л хүмүүс машинаа ухуулчихлаа гэдэг байсан юм.
Т.Ганхуяг:
ЖИЖҮҮР ХИЙХ НАЙДВАРТАЙ ХҮН ОЛДОХГҮЙ БАЙНА ГЭДЭГ
-Хотхоны оршин суугчид маш их хохирч байна. Нэг дор хоёр, гурван машины хучлагыг ч алдаж байсан. Энэ өвөл 10 гаруй хучлага алдагдсан. Энэ талаар цагдаагийнханд хэлээд нэмэр алга. СӨХ-нд удаа дараа хэлж байсан, албан бичиг ч хүргүүлж байсан. Ямар ч харуул хамгаалалт, жижүүргүй хэрнээ СӨХ-ны татвартаа бүгдийг нь оруулж авдаг юм. СӨХ-ны дарга нь жижүүрлэх найдвартай хүн олдохгүй байна гэсээр оршин суугчдыг хохироосоор байна.
ЦАХИЛГААН, ДУЛААНААР АЙЛГАЖ ТАТВАРАА АВДАГ "ШИНЭ ҮЕ-5" СӨХ
Сүүлийн үед барилгын компаниуд энд тэндгүй хотхон барьж өрсөлддөг жишиг тогтжээ. Тэд төвлөрсөн сургууль, цэцэрлэг, хүүхэд хөгшдөд зориулсан талбай, 24 цагийн харуул хамгаалалттай зэргээр сурталчилдаг. Гэтэл "Эрэл" компанийн уг хотхонд бүр аль нь ч байдаггүй аж. "Шинэ үе" хотхон зургаан давхар, таван байртай. Нийт 300 айл оршин суудаг. Өнгөрсөн жил ашиглалтад орсон энэ хотхоны тохижуулалтад бухимдаж буй иргэд олон байна. Анх худалдан авахад өрөө бүрт онгорхой нүхтэй, хааж бөглөх арга хэмжээ ч авч өгдөггүй. Өнгөрсөн өвөл өдрийн цагаар дулаанаа хасдаг байсан хэмээн иргэд ярьж байна. Түүнчлэн жижүүр, камержуулалт, харуул хамгаалалт байдаггүй учир захын тэнэмэл иргэд дуртай үедээ хоноглодог гэнэ. Барилгын компанийнхан үүнийг зохицуулаагүйн дээр хотхоныг хашсан хашаа, саравч нь хагас дутуу. Тонуулчид хаанаас ч гарч ирж, хаашаа ч зугтах боломжтой юм байна. Хэдхэн метрийн цаана техникийн "Өгөөмөр" зах, "Нарантуул" байрладаг учир хулгайлсан эд зүйлсээ төвөггүйхэн борлуулдаг бололтой. Машины эд ангийн хулгайн талаар иргэд тус хотхоныг хариуцдаг "Шинэ үе-5" СӨХ-ны дарга н.Сүхбалсанд хэдэнтээ ханджээ. Гэвч тэрээр "Орцны жижүүр хийх найдвартай хүн олдохгүй байна, олдсон хүмүүс нь архидаад алга болчих юм. Хүн олдохоор харуул манаатай болгоно. Харин камержуулах төсөв хөрөнгө хүрэлцэхгүй байна" хэмээн хариулдаг мөртлөө сар бүрийн татвартаа харуул хамгаалалтын 2500 орчим төгрөгийг айл бүрээс хураадаг юм байна. Түүнчлэн цэвэрлэгээ, нийтийн талбайн тохижуулалт гэрэлтүүлэг гээд сард дунджаар 15 мянган төгрөгийг иргэдээс татдаг гэнэ. Машиныхаа эд зүйлийг алдсан хохирогчид шаардлага тавин "СӨХ"-ны мөнгөө төлөхөөс зайлсхийвэл цахилгаан, дулааныг чинь тасална хэмээн дарамталсаар авч сурчээ. СӨХ нь татварын мөнгөөрөө дөрөвхөн үйлчлэгчээ 150 мянган төгрөгөөр цалинжуулдаг аж. Түүнээс өөр зарлага бараг гаргадаггүй бололтой. Тонуулч, СӨХ хоёрт дарлуулсан "Шинэ үе" хотхоныг "Эрэл" компанийнхан анхаараасай.
0 comments:
Post a Comment