“Эрдэнэс тавантолгой”-н ажилтан өлсгөлөн зарлажээ

"Эрдэнэс тавантолгой"-н ажилтан өлсгөлөн зарлажээ

"Эрдэнэс тавантолгой" компанийн ажилтан С.Эрдэнэ өчигдөр 19.30 цагаас эхлэн өлсгөлөн зарлаж эхэлсэн байна. Түүний хувьд "Эрдэнэс тавантолгой" компани нь ажилчдыг уртасгасан цагаар ажиллуулж, Хөдөлмөрийн тухай хуулийг хэрэгжүүлэхгүй байгаагийн зэрэгцээ үйлдвэрлэл явуулах нэрийн дор хүний эрх, эрх чөлөөг боогдуулж байна гэж үзэж буй ажээ. Уг нь С.Эрдэнэ Хөдөлмөрийн хуулийг мөрдөж, үйлдвэрлэлийн үйл ажиллагааг зохих норм нормативын дагуу мөрдөж ажиллахыг компанийн удирдлагадаа өнгөрсөн хугацаанд сануулж ирсэн ч арга хэмжээ аваагүй гэнэ. Харин ч түүнийг ийм шаардлага тавьсных нь төлөө дарамт шахалт үзүүлж эхэлсэн гэж тэрбээр өөрөө тайлбарлалаа. Тэрээр тус компанид оператораар ажилладаг юм байна. Хэд хоногийн өмнө түүнийг компанийнх нь удирдлага "Урсгал сөрж ажиллалаа" гэж үзэн сургалтад суух ёстой гэж үзжээ. "Ийм арга хэмжээ авч эхэлсэн нь цаагуураа өөрийг нь ажлаас шахаж гаргах гэсэн оролдлого. Сургалтад хамруулаад дараа нь шалгалт аваад улмаар тэнцээгүй гэсэн шалтгаанаар ажлаас чөлөөлөх оролдлого хийж байна" гэж тэрбээр хэллээ.

Түүний хувьд "Эрдэнэс тавантолгой" компани байгуулагдсан үеэс Тавантолгойн ордод ажиллаж эхэлсэн юм байна. Улмаар уул уурхайн ажилчдын эрх ашгийг хамгаалах зорилгоор Үйлдвэрчний эвлэлийн хороог байгуулсан. Одоогоор тус хороонд "Эрдэнэс тавантолгой" компанийн ажилчдын 60 орчим хувь нь гишүүнчлэлтэй аж. Гэхдээ тэднээс нэг нь ч энэ удаагийн өлсгөлөнд нэгдээгүй боловч шаардлагад заасан хөдөлмөрийн хуулийг мөрдөж ажиллахыг, мөн үйлдвэрлэл явуулахдаа аюулгүй ажиллагаа, уул уурхайд тавигдах норм норматив үйлдвэрлэлийн технологи гээд олон чухал заалтуудыг хэрэгжүүлж ажиллах шаардлагатай гэдэгтэй санал нэг байгаа гэнэ.

Харин өлсгөлөн зарлаад байгаа С.Эрдэнэтэй өнөөдөр "Эрдэнэс тавантолгой" компанийн орон нутаг дахь салбарын захирал н.Батхуяг ирж уулзсан аж. Мөн "Эрдэнэс тавантолгой" компани нь 260 орчим ажилтан албан хаагчтай байсан бол шинэ удирдлагатай болсноор 420-д хүрчээ. Ингэснээр ажил хийж гүйцэтгэж буй хүмүүс нь бага атлаа цалин авдаг хүмүүс ийн нэмэгдсэн гэж тэрбээр хэллээ.

Г.ДАРЬ