Нийслэлийн захирагчийн ажлын албаны хүнс худалдаа үйлчилгээний хэлтсээс согтууруулах ундаагаар үйлчлэх журам, архигүй цэнгээний газар шалгаруулах, нийслэлийн худалдаа үйлчилгээний журамд нэмэлт өөрчлөлт оруулах талаар нийслэлийн иргэний танхимд өнгөрсөн баасан гарагт хэлэлцүүлэг зохион байгууллаа.Энэ үеэр нийслэлийн захирагчийн ажлын албаны хүнс худалдаа үйлчилгээний хэлтсийн хоол хариуцсан мэргэжилтэн Я.Бадмаагаас зарим зүйлийг тодрууллаа.
-Иргэд архи согтууруулах ундааны хэрэглээг багасгах талаар ямар санал дэвшүүлж байна вэ?
-Архигүй цэнгээний газрыг олноор байгуулах асуудлыг олон хүн дэмжиж байна. Мянганы сорилын сан болон нийслэлийн эрүүл мэндийн хүрээлэнгээс хийсэн архи согтууруулах ундааны хэрэглээний талаарх судалгааны дүнг харахад манай эрчүүдийн 3.6 хувь нь согтууруулах ундааг аюултай хэмжээнд хэрэглэж байна. Одоогийн байдлаар нийслэлийн хэмжээнд 779 баар 250 орчим кафе, 500 гаруй ресторан үйлчилгээ явуулж байна. Бааранд ихэвчлэн залуус үйлчлүүлдэг. Тийм учраас архи согтууруулах ундааны хэрэглээг багасгах, зөв хэрэглээг нэмэгдүүлэх, архигүй цэнгээний газрыг бий болгох шаардлагатай байгаа. Иймээс архигүй цэнгээний газар шалгаруулах болзлыг иргэдээр хэлэлцүүлж байна.
-УИХ-аас тамхины хяналтын тухай хуулийг шинэчлэн баталсан. Үүнтэй адилаар архидан согтуурахтай тэмцэх хуульд нэмэлт өөрчлөлт оруулах уу?
-Архидан согтууралттай тэмцэх тухай хуульд нэмэлт өөрчлөлт оруулахаар бэлтгэл ажлаа хийж байгаа. Уг хуульд спиртийн агууламж нь 20 хувиас дээш байвал согтууруулах ундаа гэнэ гэж заасан байдаг. Үүнд нэмэлт өөрчлөлт оруулах гэх мэт асуудал яригдаж байна. Баар, ресторанд архи зарж л байгаа хойно залуучууд хэрэглэх нь тодорхой. Үүний оронд архигүй цэнгээний газруудыг олноор бий болгож алхоколгүй шар айраг худалддаг байж болно шүү дээ.
-Баар цэнгээний газрууд орлогынхоо ихэнх хувийг архи, согтууруулах ундаа борлуулж олдог. Цэнгээний газруудын эзэд архигүй орчин бүрдүүлэх саналыг хүлээж авах болов уу?
-Залуус архи тамхигүй цэнгээний газруудад чөлөөт цагаа өнгөрүүлэхийг үнэхээр хүсч байгаа. Ийм архигүй цэнгээний газрыг бий болгоод тодорхой хэмжээний төлбөр авдаг болчихвол заавал архи согтууруулах ундаа зарна гээд байхгүй.
Ж.САНЖААСҮРЭН
Эх сурвалж: "УЛС ТӨРИЙН ТОЙМ" сонин
0 comments:
Post a Comment