Оросын өмчлөлийн байрны түрээслэгчид гомдоллов

Оросын өмчлөлийн байрны түрээслэгчид гомдоллов

Монгол Улсад байгаа ОХУ-ын үл хөдлөх хөрөнгөтэй холбоотой асуудлаар БЗД-ийн IY хорооны оршин суугчид өнөөдөр "Монгол ньюс" мэдээллийн төвд мэдээлэл хийлээ. Тодруулбал, Хил хамгаалах ерөнхий газрын урд талд байрлах 14 дүгээр байр нь ОХУ-ын өмч гэдгээр 1999 онд УБЕГ бүртгэж авсан байдаг бөгөөд ийм ч учраас тэнд Орос иргэд суурьшдаг байна. Харин Монгол иргэд тус байрыг хөлсөлж суухад өндөр үнэ хөлс төлдөг аж. Бүртгэлийн байгууллага 1999 онд уг байрыг ОХУ-ын өмч гэж бүртгэснийг хууль бус гэж оршин суугчид үзэж байгаа талаараа сэтгүүлчдэд мэдээлэл хийлээ. 

14 дүгээр байрны 1-5 дугаар орцыг "Эдельвайз" гэх компани, 6, 7 дугаар орцыг ОХУ-ын Соёл, боловсрол, шинжлэх ухааны төв хариуцан түрээслүүлдэг ажээ. Ингэхдээ Орос иргэдэд хоёр өрөө байрыг нэг сарын хугацаанд 25 ам.доллараар, Монгол иргэдэд хоёр өрөө байрыг сарын ус дулааны мөнгөтэй нийлүүлээд 300 гаруй ам.доллараар түрээсэлдэг байна. Ам.доллараар төлбөр тооцоогоо хийж буй нь болон ялгавартай тогтоосон байрны хөлсний хувьд ч энэ нь шударга бус үйлдэл гэж тус байрны Монгол оршин суугчид хэлж байгаа юм. Энэ талаараа түрээслүүлж байгаа "Эдельвайз" компанид хандан хэлэхэд "Дуртай бол өөр байрандаа ор. Манайх та нарыг албаар байлгаагүй" гэж хариулдаг гэнэ. Тус байрны монгол оршин суугчдын хэлснээр байрны ойр орчимд байрлах хүүхдийн тоглоомын талбайг хууль бусаар авто машины зогсоол, орон сууц барьж байгуулах зэргээр ашиглаж байгаа аж. Тухайлбал, 14 дүгээр байрны орчимд байрлах хүүхдийн тоглоомын талбайн гуравны хоёрыг устгаад, автомашины зогсоол, хогийн цэг байгуулсан гэнэ.  Үлдсэнд нь эвдэрхий тоглоом авчраад тавиад тоглоомын талбай гэж нэрлэж байгаа тухай оршин суугчид нь хэлсэн юм. Тиймээс хууль хяналтынхан уг шударга бус явдалтай тэмцэж, арга хэмжээ авч өгөхийг тэд хүсч байгаа ажээ.

У.БОЛОР