Бага ангийнхны сурах бичгийг нийлүүлж дуусчээ

Бага ангийнхны сурах бичгийг нийлүүлж дуусчээ

Жил бүрийн намар хүүхдүүд сурах бичгийн эрэлд морддог. Өмнөх ангидаа хэрэглэж байсан сурах бичгээ бусадтай сольж, хэрэглэхийн дээр хэвлэгдээд удсан болон эрэлт ихтэй сурах бичгийг өндөр үнээр худалдан авахаас аргагүйд хүрдэг. Тиймээс энэ жил бага ангийн сурах бичгийг эрт хэвлэж, нийлүүлэх бодлогыг яамны зүгээс барьж байгаа ажээ. Энэ талаар бид БШУЯ-ны Суурь, бүрэн дунд боловсролын хэлтсийн мэргэжилтэн П.Жавзмаагаас сурах бичгийн хэвлэлтийн талаар тодрууллаа.

-Бага ангийн сурагчдын 38 төрлийн сурах бичгийг хэвлэхэд улсаас 2,3 тэрбум орчим төгрөг зарцууллаа. Сурах бичгийг зуун хувь дотооддоо хэвлэсэн. Тендерт ялсан "Вит пресс", "BCI", "Соёмбо", "Тод пресс" гэсэн дөрвөн үйлдвэрт тавьсан гол шалгуур дотооддоо чанартай хэвлэх шаардлага байсан. Дотооддоо хэвлэж буй эсэхийг 14 хоног тутамд шалгаж байсан. Шаардлагын дагуу хэвлэж дуусаад, зургадугаар сардаа багтаан сургуулиуд руу нийлүүлээд байна.

-1-5 дугаар ангийн сурагчдын сурах бичиг бүрэн нийлүүлэгдсэн юм байна. 6-12 ангийн сурах бичгийг хэзээ хэвлэх вэ?

-Наймдугаар сарын 10-даар хэвлэж дуусгахаар төлөвлөн ажиллаж байна. Бага ангийн сурагчдын сурах бичгийг үнэ төлбөргүй хэрэглүүлдэг бол дунд, ахлах ангийн сурагчдын хувьд сурах бичгийг тодорхой үнээр худалддаг.

-Намар болохоор сурах бичгийн үнэ өсдөг. Үүнийг хэрхэн зохицуулах вэ?

-Одоогоор сурах бичгийн үнэ ямар байх, үнийг хэрхэн зохицуулах талаар хэлэхэд эрт байна гэлээ.

Д.ЦЭЭНЭ