С.Төмөр-Очиртой холбоотой бас нэг газрын маапаан

С.Төмөр-Очиртой холбоотой бас нэг газрын маапаан

МУИС-ийн багш нар захирал асан С.Төмөр-Очирт тун ч их бухимдаж буй ажээ. Тус сургуулийг удирдаж байхдаа МУИС-д данстай байдаг гэх дэл сул газрыг мөнгөтэй, хөрөнгөтэй хүмүүст өгөхөөр улайрч байсан гэх тэрбээр энэ удаад ажлаа өгөхөөс хэд хоногийн өмнө сургуулийнхаа нэг хэсэг газрыг бусдад оноогоод өгчихсөнд энэ сургуульд данстай багш нар нь туйлын их бухимдаж буй ажээ. Нэг хэсэг МУИС-ийн оюутны байрны өмнөх газрыг солонгосчуудад зарсан, "Орчлон констракшн"-аар сургуулийнхаа өргөтгөл буюу номын сан, багш нартаа зориулсан орон сууц бариулахын тулд "А" зэрэглэлийн газраасаа гар таталгүй бэлэг болгон өгөх гэж байсан гэх тэрбээр энэ удаад МУИС-ийн хичээлийн хоёрдугаар байрны хажуу талын хэсэг газрыг нэгэн компанид удаан хугацаагаар түрээслэж орхисонд асуудлын гогцоо байгаа юм. Энэ тухай багш нар "Бид нэг л өглөө машинаа тавих гэтэл харуул хамгаалалтын гэх нөхөд машинаа зогсоолд тавих гэж буй юм бол мөнгөө төл хэмээн дарамталсан. Бид насаараа энэ сургуульд ажилласан, тэгээд ч сургуулийнхаа мэдлийн газарт машин тавихын тулд яагаад мөнгө төлөх ёстой юм гэтэл, дарга нар тийм үүрэг өгсөн. Тэр асуудал чинь бид нарт хамаагүй" гээд хөдөлж өгөөгүй. Ингээд яах ч аргагүй болж машинаа төлбөртэй гэх зогсоолд тавьж эхэлсэн. Бид энэ асуудлаар удаа дараа сургуулийн захиргаанд хандсан ч бид мэдэхгүй гэсэн хариулт өгдөг. Гэтэл С.Төмөр-Очир захирал ажлаа өгөхөөс хэд хоногийн өмнө дээрх газрыг хувийн компанид түрээслүүлээд тэр нь өдөр шөнөгүй биднээс мөнгө нэхдэг болсон" гэсэн юм. Тэдний өгүүлснээр сургуулийн захиргааны зүгээс энэ асуудлыг ихэд нууцалдаг бөгөөд багш нар нь С.Төмөр-Очир захирал ямар компанитай ийм гэрээ байгуулаад багш нарынхаа халаасыг сэгсрээд буйг асуухаар "Бид мэдэхгүй" гэсэн хариулт өгдөг хэмээн бухимдсан билээ. Иймээс өчигдөр багш нарын заасан газарт очиж төлбөртэй зогсоолын харуул гэх 40 орчим насны эрэгтэйтэй уулзаж энэ талаар тодрууллаа.

Тэрбээр "Би энэ тухай мэдэхгүй. Сургуулийн захиргаа нь мэдэж байгаа. Би мөнгө л хураадаг" гэсэн бөгөөд энэ зогсоолд машинаа нэг цаг тавихад 1000 төгрөг, 20:00 цагаас хойш машинаа авбал торгууль гэж нэмж мөнгө төлдөг ажээ. Мөн машинаа хонууллаа гэхэд 3000 төгрөгийн төлбөр өгөх ёстой гэнэ. Бид түүнээс энэ зогсоол ямар компанид харьяалагддаг, өдөрт хэчнээн төгрөг хураадаг, мөнгөө хэнд тушаадаг талаар лавласан ч энэ миний мэдэх асуудал биш гэснээр тэрбээр мэдээлэл өгөхөөс татгалзсан. Иймээс бид сургуулийн удирдах ажилтнуудтай уулзах гэсэн ч гуравдугаар сарын эхээр төрийн өмчийн их, дээд сургуулиудын захирлын сонгон шалгаруулалт болно гэсэн тов гарсан. Тэгээд ч БШУЯ-ны төрийн нарийны үүрэг гүйцэтгэгч нэгэнт жинхэлж одоо сургуулиудын захирлын асуудал яригдаж эхэлсэн тул бүх дарга нар яам хавиар явж байгаа байх. Одоогоор эзэнгүй байна гэсэн хариултыг багш нар нь өглөө. Ингэснээр бидэнд энэ хэсэг газар сургуулийн захиргаанд харьяалагддаг уу, эсвэл эрх мэдэл бүхий нэг компани хууль бусаар авчихсан уу гэдгийг тодруулах боломж олдсонгүй.

МУИС-ийн захирал асан С.Төмөр-Очиртой холбоотой таагүй баримтуудыг багш нар нь байнга ярьдаг. Тухайлбал, тэрбээр томилолт нэрээр өөрийн гэх баахан хүнийг дагуулан долоо хоног өнжихгүй шахам гадагшаа явж их мөнгө үрдэг байсан, өндөр үнээр машин худалдаж авсан ч тэр нь осолд орж одоо хувийнх нь эдлэн болох "Хангай" дээд сургуулийн хашаанд байгаа. Түүнчлэн өөрийн гэсэн хамаатан садан, танил нөхдийн хүүхдүүдийг сургуулийн дүрэм журам зөрчин шахаагаар тэтгэлэгт хамруулдаг гэх мэт түүнийг тойрсон маш их асуудал байдаг юм. Тэгвэл тэрбээр энэ удаад ажлаа өгөхөөсөө өмнө сургуулийн мэдлийн "А" зэрэглэлийн газрыг бусдад түрээслэсэн нь багш нарт ил болоод байна. Бид түүнийг ямар нэртэй компанид дээрх газрыг түрээсэлж буйг тодруулж, уншигчдадаа мэдээлэл өгөх болно.

Л.ГЭРЭЛ

Эх сурвалж: "ӨДРИЙН ШУУДАН" сонин